(ភ្នំពេញ) ៖ រដ្ឋលេខាធិការនិងជាអ្នកនាំពាក្យក្រសួងសុខាភិបាល លោកស្រី ឱ វ៉ាន់ឌីន នៅល្ងាចថ្ងៃទី១៤ ខែមេសា ឆ្នាំ២០២១នេះ បានផ្ញើក្នុងតេឡេក្រាមផ្ទាល់ខ្លួនដោយសូមអំពាវនាវជូនដល់បងប្អូនប្រជាពលរដ្ឋទាំងអស់​​សុំរក្សាភាពស្ងប់ស្ងៀម​ជាជាងសម្រុកទៅផ្សារដែលបង្កើតបានជាភាពកកកុញមនុស្សច្រើនជំរុញនូវហានិភ័យកាន់តែខ្ពស់ឡើងថែមទៀតដល់បងប្អូនក្នុងការឆ្លងវីរុសកូវីដ-១៩​។ 

លោកស្រី ឱ វ៉ាន់ឌីន បានបន្តទៀតថា បងប្អូនអាចនឹងឆ្លងជំងឺកូវីដ-១៩​ បានគ្រប់ពេលនៅពេលដែលនៅកន្លែងប្រជ្រៀតគ្នាខ្លាំងពេកនោះ​ ឬកន្លែងដែលមិនមានគម្លាតគ្នាពីមួយម៉ែត្រកន្លះឡើង ហេីយមិនមានពាក់ម៉ាស់​ និងលាងដៃញឹកញាប់ទេនោះ។  

ក្នុងសារតេឡេក្រាមលោកស្រី ឱ វ៉ាន់ឌីន បានរំលឹកបន្ថែមថា សូមត្រូវចងចាំថា​ វីរុសកូវីដ-១៩​ សប្បាយចិត្តខ្លាំង​ ចូលចិត្តខ្លាំង​ និងពេញចិត្តជាទីបំផុត​ ក្នុងការដើរចម្លងពីបុគ្គលម្នាក់ទៅម្នាក់ទៀត​បានយ៉ាងងាយស្រួលដោយមិនមានរបាំងហាមឃាត់​ ឫសម្លាប់វីរុសដ៏សាហាវនេះនោះ។  

អ្នកនាំពាក្យរូបនេះបានបញ្ជាក់ថា សុំជឿជាក់លើវិធានការរបស់រាជរដ្ឋាភិបាល​ដែលមានការគិតគូរត្រឹមត្រូវ​ នឹងមិនបិទជិតឈឹងមិនឱ្យមានវិធីក្នុងការរកម្ហូបអាហារទទួលទាននោះឡើយ​។ សូមចូលរួមអនុវត្តវិធានការ​ ៣ការពារ​ +​ ៣កុំ​ +​ ចាក់វ៉ាក់សាំងការពារកូវីដ-១៩​ +​ចូលឆ្នាំនៅផ្ទះ​ ដើម្បីឈ្នះការវ៉ៃលុកកូវីដ-១៩​ ដោយបុគ្គលមានការទទួលខុសត្រូវខ្ពស់សម្រាប់សុខភាពផ្ទាល់ខ្លួន​ សុខភាពគ្រួសារខ្លួន​ និងដើម្បីសហគមន៍យើង​៕